சிபில் வெத்தசிங்ஹே இலங்கையைச் சேர்ந்த குழந்தைகள் புத்தக எழுத்தாளரும் சித்திரக் கலைஞருமாவார். இலங்கையில் குழந்தைகள் இலக்கியத்தின் மூத்த ஆளுமையாகக் கருதப்படும் வெத்தசிங்ஹே, பல்வேறு மொழிகளில் மொழிபெயர்க்கப்பட்ட 200க்கும் மேற்பட்ட குழந்தைகள் புத்தகங்களை உருவாக்கியுள்ளார். அவரது மிகவும் பிரபலமான இரு படைப்புகள் "Child In Me" மற்றும் "Eternally Yours" ஆகும்.
சிபில் வெத்தசிங்ஹே 1927 அக்டோபர் 31ஆம் திகதி, ஐந்து உடன்பிறப்புகளில் இரண்டாவதாகப் பிறந்தார். தனது குழந்தைப் பருவத்தின் முதல் ஆறு ஆண்டுகளை காலி புறநகரிலுள்ள கிந்தோத்த கிராமத்தில் கழித்த அவர், அங்கிருந்த கிந்தோத்த பௌத்த பாடசாலையில் தனது ஆரம்பக் கல்வியைத் தொடங்கினார். பின்னர் அவரது குடும்பம் கொழும்புக்கு இடம்பெயர்ந்தது, அங்கு அவர் 6 வயதில் பம்பலப்பிட்டியிலுள்ள ஹோலி ஃபமிலி கான்வென்ட் பாடசாலையில் சேர்ந்தார். அவரது தாத்தா ஒரு சிற்பியாக இருந்தார். அவரது தந்தை ஒரு கட்டிடக் கொத்தனார் (building contractor) ஆகவும், தாயார் லேஸ் தயாரிப்பில் திறமையுள்ள கலைஞராகவும் இருந்தனர்.
1952ஆம் ஆண்டு, ஜனதா செய்தித்தாளில் பணியாற்றிக் கொண்டிருந்தபோது, வெத்தசிங்ஹே கதைகள் எழுதுவதற்கான தனது முதல் முயற்சியை மேற்கொண்டார். 1952ஆம் ஆண்டு செய்தித்தாளின் குழந்தைகள் பக்கத்திற்காக குடா ஹோரா (Kuda Hora) எனும் ஒரு கதையை அவர் உருவாக்கினார். இந்தக் கதை இறுதியில் உள்ளூரிலும் சர்வதேச அளவிலும் விமர்சன ரீதியான பாராட்டைப் பெற்ற ஒரு புத்தகமாக வளர்ச்சியடைந்தது. குடா ஹோராவின் வெற்றியால் ஊக்கமடைந்த வெத்தசிங்ஹே, எழுத்துப் பணியிலும் சித்திரம் வரைதலிலும் தன்னை முழுமையாக ஈடுபடுத்திக் கொண்டு, தனது தொழில் வாழ்க்கையில் 200க்கும் மேற்பட்ட குழந்தைகள் புத்தகங்களை உருவாக்கினார்.
தனது தொழில் வாழ்க்கை முழுவதும், வெத்தசிங்ஹே சர்வதேச அளவில் பெரும் பாராட்டைப் பெற்றுள்ளார், மேலும் அவரது குழந்தைகள் கதைகள் ஐரோப்பாவிலும் ஆசியாவிலும் விருதுகளைப் பெற்றுள்ளன. 2020 மார்ச் 6ஆம் திகதி, அதிக எண்ணிக்கையிலான மாற்று முடிவுகளைக் கொண்ட புத்தகம் என்பதற்காக வெத்தசிங்ஹேயின் பெயர் கின்னஸ் சாதனைகளின் புத்தகத்தில் (Guinness Book of World Records) பதிவு செய்யப்பட்டது. இது மூன்று மொழிகளிலும் பாடசாலைகளுடன் பகிரப்பட்டது. வொண்டர் கிரிஸ்டல் (Wonder Crystal) எனும் புத்தகம் இலங்கை முழுவதிலுமுள்ள குழந்தைகளிடமிருந்து மொத்தம் 20,000 முடிவுகளைப் பெற்றது, அவற்றில் சிறந்த 1200 பதிவுகள் உலக குழந்தைகள் தினத்தை (World Children's Day) முன்னிட்டு அச்சிடப்பட்ட பதிப்பில் இடம்பெற்றன.
Barefoot Bookshop, காலி வீதி, கொழும்பு, மூலம் வழங்கப்பட்டது.
