சிபில் வெட்டசிங்ஹே இலங்கையைச் சேர்ந்த ஒரு குழந்தைகள் புத்தக எழுத்தாளரும் சித்திரக் கலைஞருமாவார். இலங்கையின் குழந்தைகள் இலக்கியத்தின் முன்னோடியாகக் கருதப்படும் வெட்டசிங்ஹே, 200க்கும் மேற்பட்ட குழந்தைகள் புத்தகங்களை உருவாக்கியுள்ளார், அவை பல மொழிகளில் மொழிபெயர்க்கப்பட்டுள்ளன. அவரது மிகவும் பிரபலமான படைப்புகளில் இரண்டு "Child In Me" மற்றும் "Eternally Yours" ஆகும்.
சிபில் வெட்டசிங்ஹே 1927 அக்டோபர் 31 அன்று, ஐந்து உடன்பிறப்புகளில் இரண்டாவதாகப் பிறந்தார். தனது குழந்தைப்பருவத்தின் முதல் ஆறு ஆண்டுகளை காலி புறநகரிலுள்ள கின்தோட்டை கிராமத்தில் கழித்தார், அங்கு அவர் கின்தோட்டை பௌத்த பாடசாலையில் தனது ஆரம்பக் கல்வியைத் தொடங்கினார். பின்னர் அவரது குடும்பம் கொழும்புக்கு இடம்பெயர்ந்தது, அங்கு அவர் தனது 6வது வயதில் பம்பலப்பிட்டியிலுள்ள ஹோலி ஃபேமிலி கான்வெண்ட் பாடசாலையில் சேர்ந்தார். அவரது தாத்தா ஒரு சிற்பியாக இருந்தார். அவரது தந்தை ஒரு கட்டிட ஒப்பந்தக்காரராகவும், தாயார் லேஸ் தயாரிப்பில் திறமை வாய்ந்த ஒரு கலைஞராகவும் இருந்தனர்.
1952ஆம் ஆண்டில், ஜனதா செய்தித்தாளில் பணிபுரிந்தபொழுது, வெட்டசிங்ஹே கதைகள் எழுதுவதற்கான தனது முதல் முயற்சியை மேற்கொண்டார். 1952ஆம் ஆண்டில் அந்த செய்தித்தாளின் குழந்தைகள் பக்கத்திற்காக குட ஹொர (Kuda Hora) எனும் ஒரு கதையை அவர் உருவாக்கினார். இந்தக் கதை இறுதியில் உள்ளூரிலும் சர்வதேச அளவிலும் விமர்சன ரீதியான பாராட்டைப் பெற்ற ஒரு புத்தகமாக வளர்ச்சியடைந்தது. குட ஹொரவின் வெற்றியால் ஊக்கமடைந்த வெட்டசிங்ஹே, எழுத்துப் பணியிலும் சித்திரமெழுதுவதிலும் தன்னை முழுமையாக ஈடுபடுத்திக்கொண்டு, தனது வாழ்நாள் தொழில் பணியில் 200க்கும் மேற்பட்ட குழந்தைகள் புத்தகங்களை உருவாக்கினார்.
தனது தொழில் வாழ்க்கையில், வெட்டசிங்ஹே பெரும் சர்வதேச பாராட்டைப் பெற்றார், மேலும் அவரது குழந்தைகள் கதைகள் ஐரோப்பாவிலும் ஆசியாவிலும் விருதுகளைப் பெற்றன. 2020 மார்ச் 6 அன்று, மிக அதிக எண்ணிக்கையிலான மாற்று முடிவுகளைக் கொண்ட புத்தகத்திற்காக வெட்டசிங்ஹேயின் பெயர் கின்னஸ் உலக சாதனைகள் புத்தகத்தில் இடம்பெற்றது. இது மூன்று மொழிகளிலுமான பாடசாலைகளுடன் பகிரப்பட்டது. Wonder Crystal எனும் புத்தகம் இலங்கை முழுவதிலுமுள்ள குழந்தைகளிடமிருந்து மொத்தம் 20,000 முடிவுகளைப் பெற்றது, அவற்றில் சிறந்த 1200 பதிவுகள் உலகக் குழந்தைகள் தினத்தையொட்டி ஒரு அச்சிடப்பட்ட பதிப்பில் இடம்பெற்றன.
Barefoot Bookshop, காலி வீதி, கொழும்பு மூலம் வழங்கப்பட்டது.
